Dise dieweil sie auß den vier oberzelten Hauwen herkomen sein / werden sie darauß wachsende Hauw genannt.
Nun auß disen beiden komen vñ werden außgelesen fünff / so die Meisterhauw genandt werden / nit das wer dieselben wie Recht volbringen kann / als bald ein Meister dieser kunst zůnennen / sondern das aus denselben alle rechte künstliche stuck die einem Meister wol gezimmen zůwissen her gehen / vnd der sie recht Fechten vnd brauchen kann / fúr einen kunstreichen Fechter zůhalten / sintemal alle Meisterstuck in denselben verborgen / vnd man derer mit nichten kann entberen. Die seind der Zorn / Krump / Zwerch / Schieler / vnd Scheitelhauw.
Diese alle wie sie gemacht sollen werden / will ich ordenlich nach einander anzeigen / vnd erstlich von den Geraden Hauwen sagen / vnder welchen der erst der Oberhauw.
Oberhauw.
Der Oberhauw ist ein Gerader hauw stracks von Oben / gegen deines widerparts kopff nach dem Schedel zů / darumb er auch Schedelhauw genant wirt.
Zornhauw.
Der Zornhauw ist ein Schlimmer hauw von deiner Rechte Achsel / gegen deines widerparts lincken ohrs / oder durch sein gesicht vnd Brust / Schlims durch wie die zwo Linien / so durch die auffrecht Linien kreutzweiß vber einander sich schrencken anzeigen. Diß ist der sterckest vnder allen andern / als darinen alle krafft vnnd manligkeit des des Mans gegen seinem feindt im Kempffen vnnd Fechten gelegen / darumb er auch von den Alten Streithauw oder Vatterstreich genant vnd geheissen wirt. Von gedachten Lini findestu hernach / etc.
