Ein anders / wie du nach dem außrucken durchfahren und auff der andern seiten stossen solt.
SO du aber in solchem ausrucken gewahr wirst / das er mit seiner Stangen so behend wider ankompt / also das du jhn mit gelehrtem stoß nit ereylen kanst / so thů jhm also / Ruck jm seine Stangen abermal auff ein seiten wie vor auch / vnd laß dich mercken als woltestu wie vor stossen / aber als bald vnd in dem er mit seiner Stangen wider her zů gegen deiner eylet / in meinung deinen stoß zůversetzen / so fahr du dieweil er noch herwischt / vnder derselbigen seiner Stangen durch / vnd stoß jhm auff der andern seiten mit einem aussprung eilents vnnd gewaltig zům gesicht / Dises ist ein geschwinder durchgang / wann du einem also sein Stang ohnversehens außruckest / demnach behend vnden durch fahrest / vnd auff der andern seiten hinein stost.
Ein anders / wie du jhm die Stangen außrucken / und zů seinem fürgesetzten bein schlagen solt.
JM zůfechten bind jhm von deiner Lincken hand / mit deinem eussersten theil an das eusserste seiner Stangen / vnd truck jhm die in einem vnversehenen ruck gegen seiner Lincken hand auß / vnnd zůcke dein Stangen behend wider zů ruck / gegen deiner Lincken vmb deinen Kopff / laß hiemit dein Lincke hand von der Stangen ab / vnnd schlage mit einer Hand von deiner Rechten starck vberzwerch / mit einem weiten zůtrit deines Rechten fůsses durch sein fúß / ergreiffe demnach dein Stangen dieweil dieselbige im streich noch also durch fahrt / wider mit deiner Lincken hand / vnd schlage als dann den andern mit beiden henden / von deiner Lincken schlims
