vortheil bringest / damit du solches dester besser verstehn kanst / so will ich das oben angezeigt Reitzen / Nemen / Treffen / kurtzlich widerholen.
Findestu den Mann in einer Hůt oder quatier / darinen er auff dein stich oder hauw wartet / so Hauwe jm der nechsten Blóß zů durch / nicht das du in treffen woltest / schauw auch das du nicht zů nahe bey jm seiest / vnd hab acht das du dich in solchem hauw nicht vergebest / oder dein gewehr zů weit von dir auß der macht lassest / sonder behalt dein gewehr gleich verborgenlich bei dir in guter sterck vnd vollem gewalt / verstel dich doch mit gerberden sam habest dich verhawen / als bald er deiner gegebenen blós zůeilt mit hawen oder stechen / so erman dich gleich wider zům streich / vnd Hauwe jm sein herkomendé hauw oder stich mit der sterck von dir aus / oder hawe mit eim Dempffhauw oben darauff wie dir das werden mag / vnd das heist der Nemer / darumb das du jhm die Wehr gleich mit gewalt außnimest / welches er sich doch nicht versehen het / als bald dů jhm sein streich oder stich also genomen hast / so eile der nechsten Blóß zů / mit hauwen oder stechen / solche nachháuw heissen alsdann der Treffer.
Also hastu Reitzen / Nemen vnd Treffen / welches doch nicht anders ist dan vrsach geben zům hauw / vnd denselben geursachten hauw versetzen oder abtragen / vnd als bald auch wider nach hauwen zůr Blóß / vnd ist nicht die meinung das du jm Reitzhauw oder auch jm Nemer / wo du anders kanst / nicht treffen solt / sonder wirt allein darum so genent / dieweil die fúrnemst meinung ist / entweders in aus seinem vortheil zů reitzen / oder sein hauw ausnemen vnd abtragen / kanstu in dessen zůgleich auch treffen ist vngewert / dann solche gemelte drey stuck kanstu auch wohl durch einerley háuw volbringen / als zům Exempel.
