Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/277

From Wiktenauer
Revision as of 02:17, 12 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Verkehrter stich.

DIeser ob er wol auch auff vilerley art mag angefangen werden / so wirt er doch alwegen auff ein weiß geendet / zů dem schicke dich also / steht dein gegenman in gerader versatzung / oder Eisenporten vor dir / so stich jhm auß der rechten Vnderhůt gerichts vbersich / inwendig seiner Wehr hart an seiner klingen zů seinem gesicht / vnd jm hinstechen so wende die Lange schneide gegen seiner klingen vnd deiner Lincken vbersich / truckt oder fúrt er dir dein klingen gegen seiner Rechten von jhm vbersich oder zůr seiten auß / so laß die deine oben wider gegen dir vmbschnappen / also starck das sich dein klingen neben deiner Lincken vndersich vmb mit dem ort vnden auff wider vbersich vnder seiner klingen hinein verschwing / stich also mit verkehrter hand bey seinem rechten Arm vnder seiner klingen hinein / wie du solches an den kleinern bossen in der Figur welche mit dem C. gezeichnet / zůr Lincken hand sehen kanst. Die spitz můß in disem stich jm ersten schwung / mit vmbschnappen angesetzt werden / sonst ist der stich zů schwach.

Zuck als bald dein Wehr gegen deiner Lincken ab / vnnd Hauw von dannen ein Wehrstreich durch sein Rechte Achsel / gesicht oder seiten / oder laß wider úber dein hand vmbschnappen / vndstich jhm außwendig seines rechten Arm wider zů seinem gesicht / also das in solchem fúrstechen / die offen hand oben die halb schneid gegen seiner wehr gekehrt stande / in solchem allem bucke dich mit deinem Kopff wol gegen deiner Lincken vndersich auß seinem wehr / disen stich můß er wehren vnd abwenden / als bald er dann solches thůt / so fúhre die spitz ausserhalb seinem Arm wider herumb / also das du in solchem vmbfahren die hand wider wie vor verkehrst / vnd stich mit verkehrter hand wie vor vnder seinem rechten Arm zům leib / folg mit dem Wehrstreich wie vorgelehrt nach.

Doppel stich.

BEgegnet dir einer in der Eisenporten gerad vor jhme / so stich jhm auß der Vnderhůt von deiner Rechten / inwendig hart an seiner Wehr bey seinem gefeß / vbersich zů seinem gesicht / damit zwingestu jhn / das er mit seinem gefeß vbersich auffahren můß / als bald du gewahr wirst das er mit seinem gefäß vbersich fehrt zůuersetzen / so hebe dein gefeß jm hineinstechen auch vbersich / mutier dein vnderstich in ein Obern / vnd stich also hinder oder neben seinem gefeß von vberzwerch zům leib.