Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/258

From Wiktenauer
Revision as of 01:40, 12 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Vnderhut.

DIe Vnderhůt spreit sich auch vnden herumb zů dreyen malen / nemlich gerad vor dir / vnd zů beiden seiten / die gerad aber ist nichts anders dann das ende eines geraden Oberhauws / wie dann die zů den seiten das ende der schlimmen Zornháuw seind / dann du kompst mit deiner Wehr nach ende des gemelten Oberhauws also / das dein kling langst vor dir ausgestreckt mit dem vordern ort auff die Erden gegen dem Mann / vnd dein gefáß mit ausgestrecktem Arm vnd nachgehendem leib / wol vor deinem gebogenen knie auch zůr erden gesuncken gehalten werde / wirt anders selten zů einer Hůt oder wart gebraucht.

Vnderhůt zůr Rechten.

IN dise Hůt schicke dich also / stand mit deinem rechten Fůß vor / halt dein Wehr mit hangendem stracken arm auswendig deines Rechten schenckels neben dir / laß die spitzen das ist der vordern ort außwerts vor dir auff der erden lige / aller dings wie solches an dem grossern Bild in der Figur D. zůsehen / wie du nun von der Vnderhůt zůr Rechten gelehrt bist / also verstand auch von der Vnderhůt zůr Lincken / doch das du den rechten Fůß alwegen vorsezest / so stehestu allderings wie vom Wechsel jm Dusacken gesagt / vnd hastu es recht gemacht.

Eisenport.

ZU deren schicke dich also / stand mit dem rechten Fůß vor wie alwegen / halt dein Wehr mit fúrsich hangendem stracken Arm vor deinem rechten Knie / also das die Spiz fúrsich auff gegen des Mans gesicht stande / wie das Bild in hienach gedruckter Figur so mit dem Buchstaben C. verzeichnet ausweiset / / wirt darumb Eisenport genant / dieweil du in diesem Leger vor deines gegenparts stichen vnd háuwen / gleich wie hinder einer eisenen thür nicht allein wol verwart / sonder auch dein gegenpart hierauß mit allerley stucken sicher betrengen kanst / so du anders die Wehr in diesem Lager sampt den stucken / ein jedes zů seiner gelegenheit recht fúhrest / du kanst auch dein wehr in solcher form behalten / vñ gegen der Rechten vnd Lincken seiten verzucken / oder zůr seiten gleich so wol als gerad von dir führen / Also hastu die Eisenporten gerad vor dir / vnd zů beyden seiten.