Wiktenauer logo.png

Page:Gründtliche Beschreibung der Kunst des Fechtens (Joachim Meÿer) 1570.pdf/232

From Wiktenauer
Revision as of 02:19, 11 February 2015 by Michael Chidester (talk | contribs) (→‎Proofread)
(diff) ← Older revision | Latest revision (diff) | Newer revision → (diff)
Jump to navigation Jump to search
This page has been proofread, but needs to be validated.

Nachreisen lern mit jedem gefert /
 Reisestu nach vnd folgst mit schnitten /

Er sey banden weich oder hert /
 Seins Arms nim war biß behend mit tritten.

Was das nachreisen / vnd das es ein sonderlich Kunstuck sey / hastu bißher gnugsam gehórt / derhalben wil ich dir allein hie anzeigen / wie du im nachreisen dich der stárck vnnd schwech / deßgleichen hert vnd weich gebrauchen vnd dargegen fechten solt / ein kurtze anleitung geben.

Vnd merck wañ er in den Banden mit dem widerhalten hart an deinem Dusacken ist / so fahr oder wechsel behend vnden durch oder lasse wider ab zu ruck vmbschnappen / dauon du bißher nach lenge gelehrt bist / belt er aber nit hart wider / sonder ist weich mit dem Band an deinem Dusacken / so trucke jhm deñ in einem ruck von dir / doch soltu mit solchem außtrucken nicht zu weit verfallen / auff das du jm behendiglich mit dem Schnit oder mit hauwen an der Blósse (ehe dañ er dir die wider entziehe) seyest.

So du jhm aber an die stercke seines Dusackens angebunden hast / wie das zugangen wehre / so volge jm (wo er dir von dannen vmbschlecht) mit dem Schnit gegen seinem Arm vnnd der Blóß zu / vnd schauw das du dich dem Arm nach nit(wo er dir durchgehn wurde) verfahrest / solches alles verstand von beiden seiten / wie du aber von der Schwech mit Schnitten oder Zügen nachreisen solt / findestu in stucken hin vnd wider / die solches verstendigen gnugsame Exempel.

Von dem Eber

Das dreyzehend Capitel.

ALso hastu die ober Leger / sampt jren stucken zum theil gehórt / nun volgen die vnd Leger auß welchen die Oberhutté gebrochen werden / dañ wañ dein gegenpart auff dich von oben ficht / so soltu gegen jm von Vnden fechten / die Hut des Ebers wirt allein zur Rechten gebraucht / auff solche weiß wie das Bild zur Lincken in der figur so mit dem Buchstaben M. verzeichnet / außweiset.