Das ist du solt acht haben / wann du jhm mit dem Schnit auffgesessen bist / das du jhn nit gleich ledig solt lassen / sondern einmal oder zwey mit dem Schnit nachvolgen / vnnd jhn damit an seiner arbeit vnd stuck verhindern / wann er sich dann am wenigsten versihet soltu listig jhme vnmercklich ehe ers gleich gewahr wirt / mit dem Schwerdt entfliegen / einer andern der nechsten Blóß zů / ist ein recht Meisterstůcklein / damit begine das ist.
Zů allen vier enden treib die treffen /
Die zůcken lern / wiltu sie effen.
Der vier Blóssenen můstu wol bericht sein / wilt du anderst etwas gewisses Fechten / dann du fichtest fůr háw vnd stuck so gůt sie wóllen / wann du nicht in einem jeden quatier weist ab zůbrechen / vnnd die fúrgenommene stuck zů mutieren / in andere fúglichere arbeit verwandelen / jhe nach dem er gegen dir ficht/ vnnd deinen stucken begegnet / dann es kan geschehen das du ein stuck dir fúrnimbst / einer Blóß zů / vnd aber er sich so gegen dir schickt das du ein andere nehere Blóß haben kanst / welche gelegenheit dir entgienge / so du dein fúrgenommen stuck also ohne auffmerckens anderer zůfelliger gelegenheit zůfechtest / darumb fleiß dich das du bald bedacht seyest / zů allen vier Blóssen frey fliegent zůfechten / Dieweil du der arten nur dreyerley hast zůhauwen vnd zůschlagen / als mit Langer vnd kurtzer schneide / vnnd mit der flech / von welchen alles Fechten zůsamen Componiret / nach den vier theilen das Manns gerichtet / auß welchen sich dann all andere zůfellige stuck als Zůcken / Doplieren / Ablauffen / geben / davon hievor gnugsam gehandlet.
Abschneiden / Schlaudern bring auch mit /
Die herten gefehrt weiß ab mit Schnit.
Wann du nun also deine stuck zů all vier Blóssenen lauffen last / wie hievor gelehret / so hab gleich auch mit achtung auff seinem lauff / das ist auff sein stuck / also das du jhme die nach gelegenheit steckest vnnd abschneidest / darumb so hindere vnnd schneide jhm sein stuck also lang ab / biß du dein gelegenheit ersihest zůr andern arbeit / Die
