Page:Der Altenn Fechter anfengliche kunst (Christian Egenolff) 1531-1537.pdf/48

Stoß, ring, wehr, lern zucken.

So er mit dem gehültz auff fert, In des wend dein schneide ihm über sein handt, truck frisch undersich zur lincken.

Oder wend die lang schneid oben, In des sencke dein ort auff sein brust, treib ihn also zeruck.

Sticht er dir zum gesicht, setz den stich ab mit lerer handt, und laß dein messer fallen, greiff mit deinr rechten in sein messer nahe bei seinem gehültz, mit der lincken verkerten in die schweche seins messers, truck oben von dir, reiß unden mit der rechten zwischen sein bede arm uff dein rechte seit, so nimpstu ihms messer,

Fert er dir aber über an deinen hals, und wil dich werffen, so greiff mit der rechten handt hinden auff seinen elnpogen, und schieb ihn wol auff sein rechte seiten, und greiff mit deiner lincken hand zwischen sein bede arm, wol hinauff uff seinen hals seinr rechten seitten, und tritt mit deim rechten fuß hinder seinen lincken, unn wirff ihn hinder dein lincke hufft.

Fert er dir übers gehültz, als obsteht, so greiff mit deiner lincken handt in sein linck, mitt der rechten schieb ihn vonn dir, spring mit deinem rechten fuß für seinen lincken, und nim ihm das gewicht.

Oder greiff mit deiner lincken hand in seinen lincken arm, nahe bei der hand, und ruck den undersich an dich, In des schlahe deinen rechten arm über seinenn lincken, truck seine bede arm wol an deinen leib, trit mit deim rechten fuß für sein bede, und schwing dich zur lincken.

Ein ander beschliessen.

Fall ihm über seinen rechten arm mitt deinem linckenn, In des greiff unden in die mitte seines messers, und far mit dem gehültz unden durch seinen arm, in das glenck des elnpogens, wend dein linck seit an sein rechte, truck nider, trit nah an in das er auß